«TURAN» ТАРИХЫ

«TURAN» ансамблі әлемнің атақты «Carnegie hall» (Нью-Йорк, АҚШ), «Kennedy center» (Вашингтон, АҚШ), «Zellerbach hall» (Лос-Анджелес, АҚШ), «Konzerthaus» (Берлин, Германия), «Palais des festivals et des Congres» (Канны, Франция), «Salle Cartot» (Париж, Франция), П.И.Чайковский атындағы Мемлекеттік консерваторияның Үлкен залы (Мәскеу, Ресей), Мариин театрының концерт залы (Санкт-Петербург, Ресей), «Beijing concert hall» және «National Center for the Performing Arts» (Бейжің, Қытай), «Cosmopolite center» (Осло, Норвегия), «Theatres des Varietes» (Монако), М.Магомаев атындағы Әзірбайжан мемлекеттік академиялық филармониясының концерт залы (Баку, Әзірбайжан), «Geneva Conservatory» (Женева, Швейцария), «Zunftsaal» (Базель, Швейцария), «Bozar» (Брюссель, Бельгия), “Ehrbar Saal» (Вена, Австрия), «Varkert Bazar» (Будапешт, Венгрия), «Diligencia» (Гаага, Нидерланды), Загреб музыка академиясының концерт залы (Загреб, Хорватия) және т.б. концерт залдарында өнер көрсеткен.

Қазіргі таңда «TURAN» ансамблінің қоржынында «Тұран» (2009 ж.), «Ер Тұран» (2011 ж.), «Ұлы Тұран» (2017 ж.), «Folk & Symphony» (2021 ж.), «Tamyr» (2024 ж.) атты CD күйтабақтары бар. Сонымен қатар «Daris», «Folk & Symphony», «Tylsym by Turan», «Bridge of Times» (А.Райымқұловамен бірге), «Tamyr» атты жобалардың авторы.

«TURAN» халықаралық кинокомпанияларымен серіктес болып, «Diriliş Ertuğrul» (реж.: Мехмет Гюнай), «İsimsizler» (реж.: Емре Конук), «Mendirman Jaloliddin» (реж.: Нұрғиса Әлмұрат) сериалдарына музыка жазды. Сондай-ақ әлемнің танымал тұлғаларымен, ұжымдарымен коллаборация жасап, ұлттық музыка өнерін шетелге насихаттады.

«TURAN» ансамблінің кәсіби тұрғыда қалыптасуында дарынды композитор, өнертану және DВА, PhD докторы, Қазақстанның еңбек сіңірген қайраткері, Түркі мәдениеті мен мұрасы қорының Президенті Райымқұлова Ақтоты Рахметоллақызының еңбегі зор. Батыстың академиялық музыкалық аспаптары мен қазақтың ұлттық музыкалық аспаптарын тоғыстыра отырып, қазақ музыка мәдениетінде бұрын-соңды болмаған жаңа музыкалық бағыттарды дүниеге әкелді. Ол «TURAN» ансамблі мен симфониялық оркестрді байланыстыра отырып, ауқымды «Дала сыры», «Ежелгі Тұран», «Жәмилә» атты симфониялық поэмаларын, «Sounds of Time», «Қозы Көрпеш – Баян сұлу» балеттерін дүниеге әкелді. Сонымен қатар құрамында қазақтың ұлттық музыкалық аспаптары, виолончель, фортепианодан құралған «Bridge of Times», «Crossroads» атты бірегей туындыларды шығарды.

1303 жылы Венецияның "Basilica di San Marco" кітапханасынан табылған қыпшақ тілінде дұғалар, гимн және жұмбақтар жазылған көне қолжазба «Codex Cumanicus» кітабындағы құпия ноталарды композитор А.Райымқұлова мен түркітанушы-ғалым А. Гаркавец бірлесе зерттеп, қыпшақтардың «Reminiscens beati sanguinis» атты бірегей музыкалық туындысын қайта жаңғыртты. Аталған туындыны «TURAN» ансамблі негізге ала отырып, өңдеп, «Қыпшық ұраны» атты композициясын А.Райымқұловамен бірлесе қайта жаңғыртты.

«TURAN» ансамбілінің құрамындағы өнерпаздар Серік Нұрмолда, Бауыржан Бекмұханбет, Мақсат Медеубек, Ержігіт Әлиев, Жанту Дадабаев – кәсіби білікті мамандар. Ансамбльде қазақ халқының 30-дан астам ұлттық аспабы болса, топ құрамындағы әр музыкант кемі бес-он аспапта ойнайды.